မတ် ၁၆ – ၂၀၂၆
SS (VOM)
စစ်ကိုင်းတိုင်း၊ ကျွန်းလှမြို့နယ်၊ သဖန်းဆိပ်ဆည်ရှိ ရွှေမျောလုပ်ကွက်တွေမှာ မနေ့ မတ် ၁၅ ရက်၊ မွန်းလွဲ ၃ နာရီဝန်းကျင်က လေကြောင်းတိုက်ခိုက်မှု ဖြစ်ပွားခဲ့ပြီး အလုပ်သမား အများအပြား ထိခိုက် သေဆုံးခဲ့တယ်လို့ ဒေသခံတွေက ပြောပါတယ်။
“သေဆုံး များနိုင်တယ်။ ဘာလို့လဲဆို လေကြောင်းတိုက်ခိုက်မှု ဖြစ်တဲ့အချိန်မှာ ဖောင်တွေမှာ လူအုပ်လိုက်ကြီး ရှိနေတာ။ ရေထဲကျပြီး ပျောက်ဆုံးနေတဲ့သူတွေလည်း ရှိတော့ ကျွန်တော်တို့လည်း အရေအတွက် အတိအကျ မသိရသေးဘူး။ ရှာဖွေရေးတွေ လုပ်နေရတုန်းပါပဲ” လို့ ဒေသခံတယောက်က ပြောပါတယ်။
အစိုးရတပ်က တိုက်လေယာဉ် နှစ်စင်းနဲ့ လေကြောင်းတိုက်ခိုက်မှု ပြုလုပ်ခဲ့တာလို့ သိရပြီး သဖန်းဆိပ်ဆည်ရဲ့ ကောလင်းနယ်ဘက်အခြမ်း၊ ဂေါင်းဖြူကျေးရွာဝန်းကျင်မှာ ကျရောက် ပေါက်ကွဲခဲ့တာ ဖြစ်တယ်လို့ သူက ပြောပါတယ်။
“လေကြောင်းတိုက်ခိုက်မှု ဖြစ်ပြီးတဲ့အချိန် လက်နက်ငယ်တွေနဲ့ ပစ်ခတ်တာလည်းရှိတယ်။ ရွှေမျောဖောင်တွေလည်း တော်တော်များများလည်း ပျက်စီးကုန်တယ်။ ခုချိန်ထိ ရုပ်အလောင်း သုံးလောင်းပဲ ရှာတွေ့သေးတယ်” လို့ သူက ပြောပါတယ်။
အဲဒီ သဖန်းဆိပ်ဆည်မှာ လေကြောင်း တိုက်ခိုက်မှုတွေ မကြာခဏဆိုသလို ဖြစ်ပွားလျက်ရှိတာမှာ ပြီးခဲ့တဲ့ ဖေဖော်ဝါရီလ ၂၅ ရက်နေ့ကလည်း လေကြောင်းတိုက်ခိုက်မှု ဖြစ်ခဲ့ပြီး လူထိခိုက်မှု မရှိခဲ့ဘူးလို့ သိရပါတယ်။
ဒါအပြင် ဇန်နဝါရီလ ၁၄ ရက်နေ့ကလည်း လေကြောင်းတိုက်ခိုက်မှု သုံးကြိမ် ဖြစ်ပွားခဲ့ပြီး အဲဒီဖြစ်စဉ်မှာ ရှစ်ယောက်ထက်မနည်း ထိခိုက် ဒဏ်ရာရရှိခဲ့တယ်လို့ သိရပါတယ်။
စစ်ကိုင်းတိုင်းရှိ သဖန်းဆိပ်ဆည်နဲ့ ရေအားလျှပ်စစ်ရုံးကို ဒေသတွင်း လက်နက်ကိုင်တပ်တွေက ပြီးခဲ့တဲ့ ဇန်နဝါရီလကုန်ပိုင်းက အပြည့်အဝ ထိန်းချုပ်ထားတာဖြစ်ပြီး လက်ရှိ ဆည်ထဲမှာ ရွှေဖောင်တွေ အများအပြား ရှိနေကာ လက်နက်ကိုင် တပ်တွေက တရားမဝင် လုပ်ကိုင်ခွင့်ပေးထားတာ ဖြစ်တယ်လို့ သိရပါတယ်။
Photo – CJ
